Sarson-sargardonlikka chek qoʻyildi: nogironligi bo'lgan shaxslarni reabilitatsiyaga yoʻllanma olishi endi bepul va onlayn bo'ladi

Oʻzbekistonda nogironligi boʻlgan shaxslarni reabilitatsiya qilish va protezlash markazlariga yuborish tizimi elektron shaklga oʻtkazilib, inson omilisiz avtomatik navbat asosida yoʻllash tartibi joriy etildi.

Bu boradagi tegishli idoraviy hujjat 2026-yil 13-noyabr kuni Adliya vazirligi tomonidan 3974-raqam bilan davlat roʻyxatidan oʻtkazildi. Yangi tartib sohadagi byurokratik toʻsiqlarni bartaraf etish va xizmatlar shaffofligini oshirishga qaratilgan.

Avtomatik navbat va bepul xizmatlar

Hujjatga muvofiq, endilikda bemorlarni markazlarga yoʻllash “Yagona milliy ijtimoiy himoya” axborot tizimi orqali amalga oshiriladi. Elektron navbat markazlardagi mavjud boʻsh oʻrinlar sonidan kelib chiqib, tizim tomonidan avtomatik ravishda shakllantiriladi. Muhim jihati shundaki, soʻrovnomani koʻrib chiqish, yoʻllanma rasmiylashtirish hamda reabilitatsiya xizmatlarini koʻrsatish jarayonlari mutlaqo bepul amalga oshiriladi.

Yoʻllanma olish istagidagi nogironligi boʻlgan shaxs yoki uning qonuniy vakili oʻziga qulay boʻlgan quyidagi usullardan biri orqali murojaat qilishi mumkin:

- Yagona interaktiv davlat xizmatlari portali my.gov.uz orqali onlayn tarzda;
- “Inson” ijtimoiy xizmatlar markazlari yoki mahalladagi ijtimoiy xodimlar koʻmagida;
- Bevosita oʻzining oilaviy shifokoriga murojaat qilish orqali.

Ariza topshirish jarayonida fuqaro xizmatni qayerda va qanday shaklda olishni mustaqil ravishda tanlash huquqiga ega.

Tibbiy koʻrik va davolanish davriyligi

Murojaat kelib tushgach, oilaviy shifokor 5 ish kuni ichida bemorni tibbiy koʻrikdan oʻtkazadi. Agar shaxsda tasdiqlangan 569 ta tibbiy koʻrsatmadan kamida bittasi aniqlansa va 26 ta qarshi tibbiy koʻrsatma mavjud boʻlmasa, shifokor elektron yoʻllanmani rasmiylashtiradi.

Reabilitatsiya xizmatlari fuqaroning nogironlik muddatidan kelib chiqib quyidagi tartibda koʻrsatiladi:

Ambulator sharoitda — yiliga 2–3 marta;
Stasionar sharoitda — yiliga 1–2 marta.

Yangi tizim ariza beruvchilarga oʻz navbati holatini real vaqt rejimida onlayn kuzatib borish imkoniyatini taqdim etadi. Shuningdek, fuqarolar sarson boʻlishining oldini olish maqsadida belgilangan navbat yetib kelishidan 10 kun avval ularning telefon raqamiga maxsus SMS-xabarnoma yuboriladi.

Izohlar: 0
Siz identifikatsiyadan o'tmadingiz
Ro'yxatda bo'lmay turib izoh qo'shish

Tepaga

Alpha version: 0.9.1.19 build 111620 | Инструменты