Saratonga chalingan 21 yoshgacha bo'lgan bolalarning barcha dori-darmonlari xarajati davlat tomonidan qoplanadi

2030-yilga borib, yurtimizda bolalar onkologiyasi uchun zarur dori vositalariga bo‘lgan yillik ehtiyojni to‘liq ta’minlash, suyak ko‘migi transplantatsiyasi imkoniyatlarini kengaytirish hamda CAR-T kabi ilg‘or hujayra terapiyasi usullarini joriy etish maqsad qilingan.

Bu vazifalar onkologik va gematologik kasalliklarga chalingan bolalar va o‘smirlarga tibbiy yordam ko‘rsatish bo‘yicha 2025–2035-yillarga mo‘ljallangan Milliy rejaning uchinchi strategik yo‘nalishida o‘z aksini topgan.

Xususan:

• onkologik va gematologik kasalliklarga chalingan bolalar uchun zarur dori vositalarini uzluksiz yetkazib berish tizimi takomillashtiriladi;
• maqsadli terapiya va immunoterapiya imkoniyatlari kengaytirilib, zamonaviy davolash protokollari joriy etiladi;
• mamlakatimizda suyak ko‘migi transplantatsiyasi yanada rivojlantirilib, donorlar reyestri shakllantiriladi, hujayra va gen terapiyasi texnologiyalari yo‘lga qo‘yiladi;
• yuqori texnologik onkoxirurgik amaliyotlar va sifatli nur terapiyasidan foydalanish imkoniyatlari oshiriladi;
• intensiv terapiya, infeksiyalar nazorati hamda qon komponentlarini quyish xavfsizligi kuchaytiriladi.

Milliy rejada onkologik va gematologik kasalliklarga chalingan bolalar uchun zarur barcha dori vositalarini milliy reyestrga kiritish hamda ularni 21 yoshgacha bo‘lgan bemorlarga bepul berish nazarda tutilgan.

Bundan tashqari, 2030-yilgacha suyak ko‘migi transplantatsiyasi yoki hujayra terapiyasiga muhtoj bolalarning ushbu davolash usullaridan foydalanish darajasini 20 foizdan 80 foizga oshirish maqsad qilingan.