O'zbekistonda bir qator OTMlar vazirlik tasarrufiga o‘tkazildi va Nizomiy nomidagi universitet qayta nomlandi

Kuni kecha, 2-oktyabr kuni O‘zbekiston Respublikasi Prezidentining “Ayrim davlat oliy taʼlim muassasalarining boshqaruv tizimini yanada takomillashtirish chora-tadbirlari to‘g‘risida”gi qarori qabul qilindi. Mazkur hujjat bilan mamlakat oliy taʼlim va pedagogika sohasida bir qator muhim tarkibiy o‘zgarishlar belgilandi.

Boshqaruv tizimidagi o‘zgarishlar va qayta nomlanish

Qarorga muvofiq, shu paytga qadar Maktabgacha va maktab taʼlimi vazirligi hamda Ixtisoslashtirilgan taʼlim muassasalari agentligi tizimida bo‘lgan ayrim OTMlar endilikda Oliy taʼlim, fan va innovatsiyalar vazirligi tasarrufiga o‘tkazildi.

Shuningdek, ushbu qaror bilan O‘zbekiston milliy pedagogika universitetining nomi o‘zgartirilib, u Nizomiy Ganjaviy nomidagi O‘zbekiston milliy pedagogika universiteti deb qayta nomlandi.

Pedagog kadrlarni tayyorlash sifatini oshirish maqsadida Oliy taʼlim, fan va innovatsiyalar vazirligiga quyidagi strategik vazifalar yuklatildi:

Yagona tizim: Oliy maʼlumotli pedagog kadrlarni tayyorlash siyosatini yagona konseptual yondashuv asosida yuritish.
Strategik rivojlanish: Pedagogik taʼlim sohasini rivojlantirishning asosiy yo‘nalishlarini belgilash.
Zamonaviy texnologiyalar: Taʼlim-tarbiya jarayoniga ilg‘or pedagogik va axborot texnologiyalarini joriy etgan holda, pedagogik taʼlimning uzviyligi va uzluksizligini taʼminlash.
Ilm-fan va innovatsiya: Pedagogika sohasida ilmiy-tadqiqot va innovatsion faoliyatni rivojlantirish.
Boshqaruvni takomillashtirish: Pedagogika sohasida kadrlar tayyorlaydigan oliy taʼlim muassasalarining boshqaruv tizimini muntazam yaxshilab borish.

Ekspertlarning taʼkidlashicha, ushbu o‘zgarishlar mamlakatda pedagogik taʼlim sifatini yagona markazdan muvofiqlashtirish va sohadagi ilmiy salohiyatni oshirishga xizmat qiladi.