Ukraina Radasi Sviridenkoni bosh vazir lavozimiga tasdiqladi

Ukraina Oliy Radasi sobiq bosh vazir o‘rinbosari Yuliya Sviridenkoni Ukraina bosh vaziri lavozimiga tasdiqladi, deb xabar qildi deputatlar Yaroslav Jeleznyak va Oleksiy Goncharenko 17-iyul, payshanba kuni.

Sviridenko nomzodini 262 deputat qo‘llab-quvvatladi, 22 deputat qarshi ovoz berdi, 26 deputat betaraf qoldi, yana 22 deputat bu masala bo‘yicha ovoz bermadi. 2020-yil mart oyidan beri Ukraina hukumatini Denis Shmigal boshqarib kelmoqda. Bir kun avval uning iste’fosi va hukumatning ketishi Oliy Rada tomonidan bir ovozdan ma’qullangan edi. Ukraina prezidenti Vladimir Zelenskiy 16-iyul kuni kechqurun Shmigalni mudofaa vaziri etib tayinlash haqidagi hujjatlarni imzolab, Oliy Radaga yuborganini ma’lum qildi.

Yangi hukumat tuzilishi munosabati bilan Radada so‘zlagan Zelenskiy AQSh bilan bo‘lajak kelishuvlarni e’lon qildi, uning so‘zlariga ko‘ra, bu “mamlakatni mustahkamlaydi”, deb yozadi Reuters. Prezident yangi hukumatga mamlakatdagi qurol-yarog‘ va harbiy texnikaning 50 foizini o‘zimizda ishlab chiqarish bo‘yicha sa’y-harakatlar doirasida amaldagi mudofaa xaridlari shartnomalarini tekshirishni topshirib berishini aytdi.

Sviridenko AQSh bilan resurs shartnomasi bo'yicha muzokaralar olib bordi

Yuliya Sviridenko 39 yoshda, u Chernigovda tug'ilib o'sgan, keyin Kiev milliy savdo-iqtisodiyot universitetini tamomlagan. 2019-yildan buyon Sviridenko Iqtisodiyot vazirligida rahbar lavozimlarda ishlab kelgan.

2020-yil dekabr oyida u prezident devoni rahbari Andrey Yermakning o‘rinbosari bo‘ldi. 2021-yil noyabrida u Ukraina iqtisodiyot vaziri va bosh vazirning birinchi o‘rinbosari etib tayinlandi. Sviridenko AQSh bilan resurs shartnomasini muhokama qildi va aprel oyida Ukraina nomidan imzoladi.