O‘zbekistonda xorijiy qimmatli qog‘ozlar bilan operatsiyalarni amalga oshirish qoidalari belgilandi
Endilikda malakali investorlar va yuridik shaxslar xorijiy qimmatli qog‘ozlar bilan bevosita O‘zbekiston fond birjasi hamda investitsiya vositachilarining elektron platformalari orqali savdo qilishlari mumkin. Adliya vazirligi bu boradagi tegishli nizomni davlat ro‘yxatidan o‘tkazdi.

2026-yil 11-noyabr kuni davlat ro‘yxatidan o‘tkazilgan (ro‘yxat raqami 3971) Kapital bozori sohasida “Tartibga solish qumdoni” maxsus huquqiy rejimi doirasida xorijiy qimmatli qog‘ozlarning muomalasi tartibi to‘g‘risidagi nizomga ko‘ra, savdo jarayonlari bir qator qat’iy qoidalar asosida tashkil etiladi:

Kimlar ishtirok eta oladi? Xorijiy kompaniyalarning aksiyalari, obligatsiyalari va birja investitsiya fondlari (ETF) qimmatli qog‘ozlari bilan operatsiyalarni faqat malakali investorlar yoki yuridik shaxslar amalga oshirishi mumkin.

Qaysi qimmatli qog‘ozlar sotiladi? Savdoga faqat Istiqbolli loyihalar milliy agentligi (ILMA) reyestriga kiritilgan xorijiy qimmatli qog‘ozlar qo‘yiladi.

Moliyaviy cheklovlar va valyuta. Qimmatli qog‘ozlarni qarz mablag‘lari hisobidan sotib olish qat’iyan taqiqlanadi. Barcha hisob-kitoblar chet el valyutasida olib boriladi.

Raqamli qulaylik. Investitsiya vositachilari bilan shartnomalarni masofaviy raqamli identifikatsiyadan foydalangan holda, to‘liq elektron shaklda tuzishga ruxsat berildi.

Muddatlar. Investorlarning o‘z pul mablag‘larini chiqarib olish bo‘yicha topshiriqlari 3 bank kunidan oshmagan muddatda bajarilishi shart. Xorijiy qimmatli qog‘ozlarni muomalaga kiritish bo‘yicha arizalar esa vakolatli organ tomonidan 10 ish kuni ichida ko‘rib chiqiladi.

Ushbu tartib mahalliy kapital bozori infratuzilmasini kengaytirish va investorlarga xalqaro moliyaviy vositalardan qonuniy hamda xavfsiz foydalanish imkoniyatini yaratishga qaratilgan.
Izohlar: 0
Siz identifikatsiyadan o'tmadingiz
Ro'yxatda bo'lmay turib izoh qo'shish

Tepaga

Alpha version: 0.9.1.19 build 111400 | Инструменты