O‘zbekistonda xorijiy kompaniyalar soni 20 mingtaga yaqinlashdi

1-may holatiga ko‘ra, O‘zbekistonda xorijiy investitsiyalar ishtirokida 19 490 ta kompaniya faoliyat yuritmoqda. 

Yil boshidan buyon o‘tgan to‘rt oy ichida ularning soni 1326 taga yoki 7,3% ga ko‘paydi. Yillik hisobda o‘sish qariyb 3,5 mingta kompaniyani (+21,7%) tashkil qildi.

Korxonalarning asosiy qismi to‘lig‘icha xorijiy ta‘sischilarga tegishli — hozirda bunday kompaniyalar 15063 tani (+26%) tashkil etmoqda. Shu bilan birga, qo‘shma korxonalar soni ham bosqichma-bosqich o‘sishda davom etib, may oyi boshiga kelib 4427 taga yetdi.

Xitoy boshqa davlatlardan ilgarilab borishda davom etmoqda. Ayni paytda mamlakatda xitoylik investorlar ishtirokida 5615 ta kompaniya faoliyat yuritmoqda — bu yil boshiga nisbatan 571 taga va o‘tgan yilning may oyiga qaraganda 1735 taga (44,7%) ko‘p.

Taqqoslash uchun, Rossiya sarmoyasi ishtirokidagi firmalar soni bir yil ichida atigi 8,4% ga o‘sib, 3308 taga yetgan. Shunga qaramay, Rossiya qo‘shma korxonalar soni bo‘yicha yetakchilikni saqlab qolmoqda — Xitoyda bu ko‘rsatkich 788 ta bo‘lsa, Rossiyada 909 tani tashkil etadi.

Kuchli uchlikdan Turkiya ham o‘rin olgan — 2216 ta firma. Bu yanvar oyidagi darajadan 79 taga va o‘tgan yilgi ko‘rsatkichdan 252 taga (+12,8%) ko‘pdir. Qozog‘iston ham shunga o‘xshash o‘sish sur‘atini namoyish etdi — bir yilda 13% ga o‘sish bilan kompaniyalar soni 1259 taga yetdi.

Janubiy Koreya kapitali ishtirokidagi kompaniyalar soni 721 tani tashkil etib, o‘tgan yilning may oyidagi darajadan 8,4% ga, yil boshidagidan esa 4% ga oshdi. Oltinchi o‘rinni 656 ta firma (-3%) bilan Afg‘oniston egallagan bo‘lsa, yettinchi o‘ringa 452 ta kompaniya bilan Ozarbayjon joylashdi — bu o‘tgan yilgiga nisbatan 62,6% ga ko‘p.

Shuningdek, o‘ntalikka 437 ta firma (+27,4%) bilan Tojikiston, 427 ta kompaniya (+21,3%) bilan BAA va 405 ta firma (+26,5%) bilan Hindiston kirdi. Avvalroq o‘ninchi o‘rinni egallab turgan AQSh 356 ta firma bilan 12-pog‘onaga tushib ketdi — bu Qirg‘izistonga qaraganda to‘rttaga kam.

Xorijiy investorlarni qiziqtirayotgan sohalar orasida savdo yetakchilik qilishda davom etmoqda — qariyb 7 mingta kompaniya. Yana 3,86 mingta firma sanoat, 1598 tasi qurilish va 1536 tasi IT sohasida faoliyat yuritadi.