Bloomberg: “O‘rgimchak to‘ri” operatsiyasi Kremlda “g‘azab va xavotir”ga sabab bo‘ldi

«Pavutina» (O‘rgimchak to‘ri) operatsiyasi doirasida amalga oshirilgan Ukraina dronlarining Rossiya havo bazalariga hujumi front chizig‘idan uzoqda joylashgan havo flotining kutilmagan zaifligi tufayli Kremlda «g‘azab va xavotir» uyg‘otdi, deb yozdi Bloomberg Moskvadagi manbalarga tayanib.

Ukrainada operatsiya oqibatida 41 ta samolyot shikastlangani xabar qilingan. Bloomberg manbasi zarar ko‘rgan samolyotlar sonini 10 ga yaqin deb hisoblamoqda. Ayni vaqtda nashr suhbatdoshlari Ukrainaga hujum qilish uchun Rossiyaga bor-yo‘g‘i bir nechta bombardimonchi samolyotlar yetarli va bu operatsiya zarbalar miqdorini pasaytirmasligini bildirmoqda.

The New York Times (NYT) gazetasining Amerika va Yevropa xavfsizlik rasmiylariga tayanib yozishicha, yetkazilgan zararni baholash hali ham olib borilmoqda, biroq nashr manbalarining hisob-kitoblariga ko‘ra, 20 ga yaqin samolyot, jumladan, oltita Tu-95 va to‘rtta Tu-22M strategik bombardimonchi samolyotlari, shuningdek, A-50 havo desanti samolyoti jiddiy shikastlangan bo‘lishi mumkin.

Yevropalik diplomatga ko‘ra, Ukraina tomoni amalga oshirgan operatsiya mamlakatda ruhiy holatni ko‘tarishda muvaffaqiyatli bo‘lgan. Amerika rasmiysining aytishicha, prezident Donald Tramp ma’muriyati hujumdan oldin xabardor qilinmagan.

Amerika rasmiylari, NYT yozganidek, Rossiyadan Ukraina operatsiyasi uchun «jiddiy javob» bo‘lishini taxmin qilmoqda. Amerika razvedkasi hozircha u qanday nishonlarga zarba berilishini bilmaydi, biroq rasmiylarning fikricha, Moskva fuqarolik infratuzilmasiga dronlar zarbasini qayta boshlashi, Ukraina elektr tarmog‘iga zarba berishi yoki Ukrainaga o‘rta masofaga mo‘ljallangan ballistik raketalarning yangi to‘lqinlarini uchirishi mumkin.