Maktab va oliygohlarda xavfsizlik tizimi takomillashtiriladi

Vazirlar Mahkamasi qarori bilan davlat, nodavlat va xorijiy ta’lim tashkilotlari filiallarida xavfsizlik tizimlarini takomillashtirishga qaratilgan yangi tartib hamda 2026–2027 yillarga mo‘ljallangan chora-tadbirlar dasturi tasdiqlandi.

Maktab va oliygohlarda xavfsizlik tizimi takomillashtiriladi
O‘zbekiston Vazirlar Mahkamasining qarori bilan davlat ta’lim muassasalari, nodavlat ta’lim tashkilotlari va xorijiy davlatlar ta’lim muassasalari filiallarida xavfsizlik tizimlarini takomillashtirish bo‘yicha yangi nizom tasdiqlandi. Shuningdek, mazkur yo‘nalishda 2026–2027 yillarga mo‘ljallangan chora-tadbirlar dasturi ham qabul qilindi.

Hujjatga ko‘ra, ta’lim muassasalarida qo‘riqlash va nazorat-o‘tkazish tizimlari takomillashtiriladi, xavfsizlikning texnik vositalariga qo‘yiladigan talablar belgilanadi hamda favqulodda vaziyatlarda harakat qilish tartibi joriy etiladi. Shuningdek, muassasalarda videokuzatuv, kirishni nazorat qilish, xabar berish va yong‘in xavfsizligi tizimlarini bosqichma-bosqich modernizatsiya qilish ko‘zda tutilgan.

Chora-tadbirlar dasturi doirasida har bir ta’lim muassasasida xavfsizlik bo‘yicha ichki rejalar ishlab chiqish, axborot tizimlarini «Xavfsiz ta’lim» platformasi bilan integratsiya qilish, kirish-chiqishni nazorat qilish vositalari va kuzatuv kameralarini yangilash, shuningdek, qo‘riqlash xizmatlari xodimlarining malakasini oshirish ishlari amalga oshiriladi.

Qaror bilan belgilangan choralar ta’lim muassasalarida o‘quvchilar, talabalar va xodimlar xavfsizligini yanada kuchaytirish, favqulodda holatlarning oldini olish hamda zamonaviy xavfsizlik infratuzilmasini shakllantirishga qaratilgan.