19-fevral kuni O‘zbekistonda sodir bo‘lgan muhim voqealar dayjesti

O‘zbekiston Abu-Dabida bo‘lib o‘tayotgan IDEX-2025 xalqaro ko‘rgazmasida harbiy texnikalarini namoyish etdi

Birlashgan Arab Amirliklarining Abu-Dabi shahrida ikki yilda bir marta o‘tkazilishi yo‘lga qo‘yilgan dunyoning eng yirik mudofaa texnologiyalari ko‘rgazmasida O‘zbekiston Mudofaa vazirligi huzuridagi Mudofaa sanoati agentligi ham ishtirok etmoqda.

Turkiy investitsiya jamg‘armasi kapitali $600 mln gacha oshiriladi

TIFning ustav kapitali 20% ga oshirilib, 600 million AQSH dollariga yetkazilgani eʼlon qilindi. Ushbu moliyaviy o‘sish mintaqada mikro, kichik va o‘rta biznesni qo‘llab-quvvatlash, savdo va tadbirkorlikni rivojlantirishga keng imkoniyatlar yaratadi.

“Uzagrostar xolding” kompaniyasi tashkil etiladi

Tashqi va ichki bozorlarda talab yuqori bo‘lgan qishloq xo‘jaligi mahsulotlari kesimida bazaviy va qamrab olinadigan tumanlarni belgilash va ushbu hududlardagi mahallalarda mahsulot yetishtirishning ixtisoslashuvini chuqurlashtirish bo‘yicha xolding kompaniya muassisligida ixtisoslashgan kompaniyalar tashkil etiladi.

Toshkent shahridagi qurilish maydonida zinadan yiqilgan 51 yoshli erkak halok bo‘ldi

Bosh prokuratura matbuot kotibi Hayot Shamsutdinovning Uzreport.news manbasiga ma'lum qilishicha, holat yuzasidan tekshirish harakatlari olib borilmoqda.

Toshkent shahri va viloyatidagi 400 dan ortiq obyekt chiqindi chiqarish meʼyorlarini buzdi

Oʻrganishda ushbu (103 ta issiqxona, 450 ta ijtimoiy soha obyektlari va 209 ta sanoat) korxonalarning ayrimlari tomonidan atmosferaga belgilangan meʼyorlardan ortiqcha tutun, chang va gaz miqdori tashlanayotganligi aniqlandi.

Buxoroda 47 ta gaz to‘ldirish shoxobchasida narxlar sunʼiy ravishda oshirilgani aniqlandi

Buxoro viloyatidagi 47 ta avtomobillarga gaz to‘ldirish shoxobchalarida faoliyat yuritayotgan 44 ta xo‘jalik yurituvchi subyektlar tomonidan narxni sunʼiy tarzda oshirish uchun individual iqtisodiy sabablar, umumiy tashqi omillar mavjud bo‘lmagan holatda, xarajatlarga zarurat bo‘lmasa-da, narxlarni bir vaqtda yoki ketma-ketlikda oshirib isteʼmolchilarga sotish orqasidan asossiz daromad olish holatlari aniqlandi.

Asilbek Ashurov Chikago universitetining to‘liq grantini qo‘lga kiritgan ilk o‘zbekistonlik bo‘ldi

Prezident maktabi o‘quvchisi dunyo bo‘yicha 14-o‘rinda turadigan Chikago universitetiga 100 foizlik grant asosida qabul qilindi.

Omonatlarni qaytarish tartibi o‘zgardi

Endilikda bank mijozlari omonatlarini qaytarish uchun 3 oylab kutmaydi. Yangi qonunga binoan, 2026-yildan boshlab omonatlar 15 kunda, 2027-yildan esa 7 kunda to‘liq to‘lab berilishi belgilandi.

Jizzaxda qalbaki 51 ming AQSH dollarini o‘tkazmoqchi bo‘lgan shaxslar ushlandi

Mazkur holat yuzasidan jinoyat ishi qo‘zg‘atilib, tergov harakatlari o‘tkazilmoqda.

Ayrim tumanlarda kichik logistika markazlari barpo etiladi

2025-yilda Asaka, Kitob, Baxmal, Xatirchi va Farg'ona tumanlarida, 2026-yilda esa qishloq xo'jaligiga ixtisoslashgan yana kamida 5 ta tumanda kichik logistika markazlari, shu jumladan, sig'imi 100 tonnadan kam bo'lmagan muzlatkichli sig'imlar, urug'lik, ko'chat, kimyoviy vositalar va mineral o'g'itlarni tarqatish markazlari barpo etiladi.

Shavkat Mirziyoyev Saudiya Arabistoni Podshohligi haj va umra ishlari vazirini qabul qildi

Suhbat chog‘ida o‘zbekistonlik ziyoratchilarga shart-sharoitlar va ko‘rsatilayotgan xizmatlar sifatini yanada yaxshilash, ularning Saudiya Arabistoniga tashrifi xavfsiz va qulay bo‘lishini ta’minlash masalalariga alohida e’tibor qaratildi.

OTB O‘zbekistonning suv sektorini raqamlashtirish uchun 125 million dollar ajratadi

Loyiha doirasida butun suv taʼminoti va oqava suv infratuzilmasi, shu jumladan taxminan 4 million mijoz ulanishlari uchun aktivlar inventarizatsiya qilinadi va joylarda geografik xaritalash ishlari amalga oshiriladi.

O‘zbekistonda sohalar bo‘yicha yiliga o‘rtacha suvga bo‘lgan talab 51 mlrd metr kubni tashkil etadi

Suv xo‘jaligi vaziri Shavkat Hamroyevning taʼkidlashicha, bu suvlarning 15-20 foizi respublika hududida shakllansa, qolgan katta qismi qo‘shni davlatlardan oqib keladi.