Zelenskiy: Rossiya Ukrainaga 580 ta dron va 40 ta raketa bilan hujum qildi

20-sentabrga o‘tar kechasi Rossiya Qurolli Kuchlari 40 ta qanotli va ballistik raketalar va har xil turdagi 580 ga yaqin dronlardan foydalangan holda Ukrainaga ommaviy hujum uyushtirdi. Bu haqda Ukraina prezidenti Vladimir Zelenskiy Telegram’da ma’lum qildi.

Unga ko‘ra, Dnepr shahri va Dnepr, Nikolayev, Chernigov, Zaporijjya viloyatlari, shuningdek, Poltava, Kiyev, Odessa, Sumi va Xarkov viloyatlaridagi jamoalar hujumga uchragan. “Dneprda ko‘p qavatli binoga kassetali o‘q-dorilar bilan to‘g‘ridan-to‘g‘ri raketa zarbasi qayd etildi”, — dedi Ukraina rahbari. Uning qo‘shimcha qilishicha, otishma natijasida o‘nlab kishilar yaralangan, uch kishi halok bo‘lgan.

“Ukraina oʻzini va Yevropani himoya qila olishini isbotladi, ammo ishonchli qalqon yaratish uchun biz birgalikda harakat qilishimiz kerak: havo mudofaasini kuchaytirish, qurol-yarogʻ yetkazib berishni koʻpaytirish, Rossiya armiyasi va uni moliyalashtirgan sektorlarga qarshi sanksiyalarni kengaytirish”, — deya taʼkidladi Ukraina rahbari.

Dnepr meri: 22 dan ortiq uy shikastlangan

Dnepr meri Boris Filatovning so‘zlariga ko‘ra, 22 dan ortiq uy zarar ko‘rgan. Eng katta zarar daryoning o‘ng qirg‘og‘idagi ko‘p qavatli binoga yetgan. Sakkizta maktab va bolalar bog‘chasi, ikkita kasb-hunar maktabining binolari va yotoqxonalari vayron bo‘lgan. Shuningdek, elektr transport deposi va bir nechta trolleybuslar ham shikastlangan. Havo liniyalari uzilib, kamida 300 ta deraza singan. Yakuniy ko'rsatkichlar hali ham hisoblab chiqilmoqda.