Tramp Armaniston va Ozarbayjon rahbarlarini qabul qiladi, ular tinchlik bitimini e'lon qilishlari mumkin

AQSh prezidenti Donald Tramp 8-avgust, juma kuni Oq uyda Ozarbayjon prezidenti Ilhom Aliyev va Armaniston bosh vaziri Nikol Pashinyanni qabul qiladi.

Bu maʼlumotni chorshanba kuni Armaniston hukumati tasdiqladi. “7-8 avgust kunlari Armaniston Respublikasi Bosh vaziri Nikol Pashinyan AQShga tashrif buyuradi”, — deyiladi Vazirlar Mahkamasi Telegram-kanalida. “Vashingtonda Bosh vazir Pashinyan AQSh prezidenti Donald Tramp bilan Armaniston va AQSh oʻrtasidagi strategik sheriklikni chuqurlashtirish maqsadida ikki tomonlama uchrashuv oʻtkazadi, shuningdek, mintaqada tinchlik, farovonlik va iqtisodiy hamkorlikni rivojlantirish maqsadida AQSh prezidenti Donald Tramp va Ozarbayjon prezidenti Ilhom Aliyev bilan uch tomonlama uchrashuv oʻtkazadi”, - deyiladi xabarda.

Avvalroq The Washington Post nashri xabardor manbalarga tayanib, bo‘lajak uchrashuv haqida xabar bergan edi. Nashrning qayd etishicha, Tramp shu tariqa uzoq vaqtdan beri davom etayotgan mojarolar ichida qolgan Yerevan va Boku o‘rtasida tinchlik bitimini tuzishda vositachi bo‘lishga harakat qilmoqda.

The Washington Post nashrining yozishicha, uchrashuv yakunida tinchlik kelishuvi e’lon qilinishi mumkin.

13-mart kuni Armaniston Tashqi ishlar vazirligi Ozarbayjon bilan tinchlik shartnomasi matni har ikki tomon tomonidan kelishilganini va Yerevan hujjat imzolanadigan joy va muddatlar boʻyicha takliflarni muhokama qilishga tayyorligini maʼlum qildi. Ozarbayjon Tashqi ishlar vazirligi matbuot kotibi Ayxan Hajizadening aytishicha, kelishuv chegaradagi oʻq uzilishini toʻxtatish va Bokuga nisbatan hududiy daʼvolarni istisno qiluvchi Armaniston Konstitutsiyasiga oʻzgartirishlar kiritish kabi qator shartlar bajarilsa, tuziladi. Bundan tashqari, Ozarbayjon YeXHT Minsk guruhini rasman bekor qilishni talab qilmoqda, Boku uni eskirgan tuzilma deb biladi.

Yerevan bu talablarni mamlakat ichki ishlariga tegishli deb hisoblaydi. Pashinyan uning hukumati kelajakda yangi konstitutsiyani qabul qilish tashabbusi bilan chiqishi mumkinligini aytdi.