Rossiya va Ukraina o'rtasida mahbuslar almashinuvining 8-bosqichi o'tkazildi

Rossiya va Ukraina 4-iyul, juma kuni navbatdagi harbiy asirlar almashinuvini amalga oshirdi. Bu haqda birinchi bo‘lib Rossiya Mudofaa vazirligi xabar berdi; keyinroq Ukraina prezidenti Vladimir Zelenskiy almashinuv haqidagi ma'lumotni tasdiqladi. "Xalqimiz o‘z uyida. Ularning aksariyati 2022-yildan beri Rossiya asirligida", — deb yozdi Zelenskiy o‘zining Telegram-kanalida. Unga ko‘ra, Donetsk viloyati hamda Mariupol, Lugansk, Xarkov va Xerson viloyatlarini himoya qilgan harbiy xizmatchilar – Ukraina Qurolli kuchlari, Milliy gvardiya, Davlat chegara xizmati harbiy xizmatchilari, “shuningdek, tinch aholi vakillari” Ukrainaga qaytmoqda.

Rossiya Mudofaa vazirligi 2-iyun kuni Istanbulda erishilgan Rossiya-Ukraina kelishuvlariga ko‘ra, yana bir guruh rossiyalik harbiy xizmatchilar qaytarilgani, “evaziga Ukraina Qurolli kuchlarining bir guruh harbiy asirlari o‘tkazilganini” ma’lum qildi. “Ayni vaqtda Rossiya harbiy xizmatchilari Belarus Respublikasi hududida bo‘lib, u yerda ularga zarur psixologik va tibbiy yordam ko‘rsatilmoqda”, — deyiladi press-relizda.

Bu iyun oyi boshida Istanbulda ikki davlat delegatsiyalari o‘rtasida bo‘lib o‘tgan muzokaralar chog‘ida erishilgan kelishuvlar doirasidagi sakkizinchi almashinuv raundi bo‘ldi. Tomonlar o'rtasida qancha mahbus o'tkazilgani haqida ma'lumot yo'q.

Yaradorlar, og'ir kasallar va 25 yoshgacha bo'lgan harbiy xizmatchilar

Ukraina harbiy asirlarni davolash bo‘yicha muvofiqlashtiruvchi shtabning aniqlik kiritishicha, asirlikdan qaytgan harbiy xizmatchilar “yarador va og‘ir kasallar” va “25 yoshgacha bo‘lganlar” toifalariga kiradi. Ozod qilinganlar orasida askarlar, serjantlar va ofitserlar ham bor. Ularning eng kichigi 20 yoshda, eng kattasi 59 yoshda.

Shtab maʼlumotlariga koʻra, ozod etilganlarning aksariyati uch yildan ortiq asirlikda boʻlgan.