Xorijiy sayyohlar soni 33 foizga oshdi

So‘nggi yillarda O‘zbekiston Respublikasi Prezidenti Shavkat Mirziyoyevning siyosati mamlakat iqtisodiyotining asosiy harakatlantiruvchi kuchlaridan biri bo‘lgan turizm sohasini faol rivojlantirishga qaratilmoqda. Islohotlar doirasida viza tartibotlari soddalashtirilib, ko‘plab davlatlar fuqarolari uchun vizasiz rejim kengaytirildi, transport va mehmonxona infratuzilmasi zamonaviylashtirilmoqda, shuningdek, O‘zbekistonning turizm brendi xalqaro maydonda faol targ‘ib etilmoqda. Ichki turizmni rivojlantirish, yangi sayyohlik yo‘nalishlarini yaratish va xizmat ko‘rsatish sifatini oshirishga alohida e’tibor qaratilmoqda.

Ushbu chora-tadbirlar natijasida sayyohlar oqimida sezilarli o‘sish kuzatilmoqda. 2026-yilning yanvar-fevral oylarida O‘zbekistonga qariyb 1,77 million nafar xorijiy sayyoh kelgan. O‘tgan yilning mos davriga nisbatan mehmonlar soni 441 ming kishiga yoki 33 foizga oshgan.

Sayyohlarning asosiy oqimini an’anaviy tarzda qo‘shni mamlakatlar ta’minlamoqda. Tashriflar soni bo‘yicha Qirg‘iziston yetakchilik qildi — 521 mingdan ortiq kishi. Keyingi o‘rinlarni Tojikiston (469 ming) va Qozog‘iston (386 ming) egalladi.

Sayyohlar soni bo‘yicha kuchli o‘ntalikka, shuningdek, Rossiya (123 ming), Afg‘oniston (83 ming), Turkmaniston (51 ming), Xitoy (49 ming), Turkiya (24 ming), Hindiston (9 ming) va Janubiy Koreya (5 ming) kirdi.

Turizm sohasida amalga oshirilayotgan davlat siyosati O‘zbekistonga bo‘lgan xalqaro qiziqishning barqaror o‘sishiga hamda uning jozibador sayyohlik yo‘nalishi sifatidagi mavqeyining mustahkamlanishiga xizmat qilib, o‘z samaradorligini namoyon etmoqda.