O‘zbekistonning 3 hududida qarzdorlikni yo‘q qilib berish uchun pul olganlar ushlandi

O‘zbekistonning qator hududlarida tabiiy resurslardan mavjud qarzdorliklarni yo‘q qilib berishni va’da qilgan shaxslar ushlandi.

Holatlardan biri Bosh prokuratura huzuridagi departamentning Xonobod shahri bo‘limi va DXX xodimlari hamkorligida tadbirkorlik subyektlarining huquqlarini himoya qilish yuzasidan o‘tkazilgan tezkor tadbirda aniqlangan. Xonobod shahar elektr tarmoqlari korxonasi elektromontyori Sh.K. “B.X.” MCHJning “Anhor” MFY hududidagi kafe binosida elektr energiyasidan noqonuniy foydalangani holati bo‘yicha hisoblangan 32 mln so‘m zararni tanishlari yordamida 2 mln so‘mgacha kamaytirib berishi evaziga 300 AQSH dollarini olgan vaqtida ashyoviy dalillar bilan ushlangan.

Shu kabi, departamentning Uchtepa tuman bo‘limi DXX xodimlari hamkorligida o‘tkazilgan tezkor tadbirda “Toshkent shahar suv ta’minoti” AJning Uchtepa tuman bo‘limi inspektori A.B. fuqaro K.D.ning xonadonida ichimlik suvi ta’minotidan 7 mln so‘m qarzdorligini yo‘q qilib berishi evaziga 5 mln so‘mni olgan vaqtida ashyoviy dalillar bilan ushlangan.

Departamentning Jomboy tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda esa, “Hududgaz Samarqand” GTF tuman bo‘limi xodimi S.Q. fuqaro M.M.ning ishonchiga kirib, uning xonadonini gaz tarmog‘iga qayta ulab, hujjatlarini rasmiylashtirib berishi evaziga 250 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.