Logistikada yangi bosqich: O‘zbekiston temir yo‘llari orqali yuk tashish hajmi oshiriladi
O‘zbekiston mintaqaviy transport-logistika tizimidagi o‘rnini yanada mustahkamlamoqda. Joriy yilning 14–16-oktyabr kunlari Qozog‘istonda bo‘lib o‘tgan "NEW SILK WAY" VIII xalqaro biznes-forumi doirasida "O‘zbekiston temir yo‘llari" AJ boshqaruvi raisi Z.G. Narzullayev bir qator muhim uchrashuvlarni o‘tkazdi.

Muzokaralar Qozog‘iston, Ozarbayjon, Afg‘oniston va Tojikiston temir yo‘l administratsiyalarining rahbarlari bilan ikki tomonlama formatda tashkil etildi. Uchrashuvlarning bosh maqsadi — mintaqadagi yuk tashish hajmini keskin oshirish va yangi iqtisodiy imkoniyatlarni ishga solishdan iborat.


Muzokaralar davomida tomonlar transport yo‘laklarining bugungi imkoniyatlarini tahlil qilib, ulardan samarali foydalanish strategiyalarini belgilab oldilar. Asosiy e’tibor quyidagi muhim masalalarga qaratildi:

  • Hududlararo tranzit va import tashuvlarini kengaytirish uchun qo‘shimcha yuk oqimlarini jalb etish;
  • Temir yo‘l logistikasini zamonaviylashtirish va yuklarni o‘z vaqtida, xavfsiz yetkazib berish tizimini shakllantirish;
  • Xalqaro yo‘nalishlarda barcha tomonlar uchun qulay va jozibador tarif hamda xizmatlarni joriy qilish.
Uchrashuvlar yakunida O‘zbekiston va hamkor davlatlar o‘rtasida yuk tashish hajmlarini o‘zaro oshirish bo‘yicha aniq kelishuvlarga erishildi. Ushbu bitimlar nafaqat temir yo‘l sohasidagi aloqalarni kengaytiradi, balki Markaziy Osiyo va Kavkaz mintaqasini bog‘lovchi savdo ko‘priklarini yanada mustahkamlaydi.
Izohlar: 0
Siz identifikatsiyadan o'tmadingiz
Ro'yxatda bo'lmay turib izoh qo'shish

Tepaga

Alpha version: 0.9.1.19 build 101721 | Инструменты