Tramp Suriyaga qarshi 2004-yildan beri joriy qilingan sanksiyalarni bekor qildi

AQSh prezidenti Donald Tramp Suriyaga qarshi 2004-yildan beri amalda bo‘lgan sanksiyalarni bekor qilish to‘g‘risidagi farmonni imzoladi, deb xabar bermoqda Oq uy rasmiy saytida.

Ijroiya qarori, xususan, ayrim tovarlar bo'yicha eksport nazoratini yumshatishga imkon beradi va Suriyaga xorijiy yordam bo'yicha cheklovlarni olib tashlaydi.

Shuningdek, Tramp AQSh Davlat kotibi Marko Rubioga Suriyaning terrorizmga homiylik qiluvchi davlat maqomini va Hayat Tahrir ash-Shamni xorijiy terrorchi tashkilot sifatida tan olish qarorini qayta ko‘rib chiqishni topshirdi.

Bundan tashqari, farmon Suriya yetakchisi Ahmad al-Sharaning AQShning o‘ta xavfli xalqaro terrorchilar ro‘yxatiga kiritilishini qayta ko‘rib chiqishni talab qiladi.

May oyida Yevropa Ittifoqi Suriyaga nisbatan iqtisodiy sanksiyalarni rasman bekor qilgan edi. 24 ta band, jumladan, Suriya Markaziy banki va neft ishlab chiqarish va paxtani qayta ishlash sohalarida faoliyat yurituvchi kompaniyalar roʻyxatdan oʻchirildi.

AQSh, o'z navbatida, Suriya havo yo'llari, bir nechta banklar, jumladan, Markaziy bank va yuk tashish kompaniyalarini sanksiyalar ro'yxatidan olib tashladi. AQSh G'aznachiligi Suriyaning Sytrol neft kompaniyasi va energetika sohasidagi boshqa ba'zi tashkilotlar bilan ham bitimlar o'tkazishga ruxsat berdi.

Suriyaga qarshi o‘nlab yillar davomida joriy etilgan sanksiyalarni bekor qilish haqidagi munozaralar mamlakatning sobiq prezidenti Bashar al-Assad hokimiyatdan ag‘darilganidan keyin boshlangan. “Hayat Tahrir ash-Sham” guruhi rahbari Ahmad al-Shara oʻtish davri prezidenti boʻldi.