Suriyaning yangi rahbari Rossiya bilan barcha kelishuvlar saqlanib qolishini tasdiqladi
Moskvaga tashrifi chog‘ida Ahmad al-Shara Suriya Bashar al-Asad davrida erishilgan barcha kelishuvlarni bajarishiga va’da berdi. Uning so‘zlari Rossiyaning Suriyadagi harbiy bazalari qolishini nazarda tutadi.
Suriya prezidenti Ahmad al-Shara 15-oktabr, chorshanba kuni Moskvaga tashrifi chog‘ida Rossiya prezidenti Vladimir Putinni Damashqdagi yangi hokimiyatlar Rossiya va Suriya o‘rtasida avval tuzilgan barcha kelishuvlarga amal qilishiga ishontirdi. Kuzatuvchilar al-Sharaning bayonotini Rossiyaning Suriyadagi ikki harbiy bazasi — Xmeymim va Tartusdagi harbiy-dengiz bazasining kelajagi kafolatlanganligidan dalolat sifatida talqin qilmoqda.
O‘tgan yil oxirida Moskvaning uzoq yillik ittifoqchisi Bashar al-Asadni hokimiyatdan ag‘dargan Al-Shara avval Abu Muhammad al-Juloniy nomi bilan mashhur bo‘lgan va “Al-Qoida” islomiy terrorchilik guruhining Suriyadagi bo‘limi “Hay’at Tahrir ash-Shom”ga rahbarlik qilgan. 2020 yilda Rossiya hukumati uni terrorchi tashkilot deb tan oldi va shu sababli uni taqiqladi.
"Rossiya va Suriya ikki tomonlama munosabatlarga va umumiy manfaatlarga ega va biz erishilgan barcha kelishuvlarni hurmat qilamiz. Biz Rossiya bilan munosabatlarning mohiyatini qayta belgilash ustida ishlamoqdamiz", dedi al-Shara Kremldagi muzokaralar boshlanishida.
O‘z navbatida Putin Suriya rahbarini oktyabr oyi boshida bo‘lib o‘tgan parlament saylovlari bilan tabrikladi. “Menimcha, bu siz uchun katta muvaffaqiyat, chunki bu jamiyatni mustahkamlashga hissa qo‘shadi”, — dedi Rossiya prezidenti va Moskva Damashq bilan munosabatlarni yangilashga tayyorligini ta’kidladi.
.png "YouTube UZREPORT TV")
