AQShning Hyundai zavodiga qilingan reydda 475 nafar migrant hibsga olindi

5-sentabr kuni Jorjiya shtatida Janubiy Koreyaning Hyundai kompaniyasining elektromobillar uchun akkumulyatorlar ishlab chiqaruvchi zavodiga reyd o‘tkazish chog‘ida AQSh immigratsiya xizmati tomonidan Janubiy Koreyaning 300 dan ortiq fuqarosi qo‘lga olindi. Bu haqda 6-sentabr, shanba kuni Janubiy Koreya tashqi ishlar vazirligi hibsga olinganlar uchun “katta mas’uliyat his qilayotganini” ko‘rsatib ma’lum qildi.

"Bir kun avval AP agentligi AQSh Ichki xavfsizlik vazirligi maʼlumotlariga tayanib, ushbu reyd davomida jami 475 nafarga yaqin xorijlik qoʻlga olingani haqida xabar berdi. Nashr hibsga olinganlarning aksariyati Janubiy Koreya fuqarolari ekanligini va reydning oʻzi soʻnggi 20 yildagi eng yirik bunday operatsiya boʻlganini taʼkidladi. “Hyundai biz ishlayotgan barcha bozorlarda barcha qonun va qoidalarga rioya qilishga intiladi. Bunga xodimlarning ishga joylashuvi va immigratsiya qonunlariga rioya etilishini tekshirish talablari kiradi”, — deyiladi avtomobil ishlab chiqaruvchisi bayonotida.

AQShdan noqonuniy muhojirlarni deportatsiya qilish

Janubiy Koreya hukumati o‘z fuqarolarini nishonga olgan operatsiyadan “xavotir va afsusda” ekanini bildirdi, deb yozadi nashr. AP eslatganidek, AQSh prezidenti Donald Tramp maʼmuriyati noqonuniy muhojirlarni aniqlash boʻyicha operatsiyalarni faol olib bormoqda, biroq shu paytgacha janubiy koreyaliklar boshqa mamlakatlar fuqarolariga nisbatan kamdan-kam hollarda hibsga olingan.

Hisobotda keltirilgan AQSh Immigratsiya va bojxona nazorati (ICE) maʼlumotlariga koʻra, 2023-yil 30-sentabrdan 2024-yil 30-sentabrgacha boʻlgan 12 oy ichida AQShdan atigi 46 nafar janubiy koreyalik deportatsiya qilingan. Bu davrda jami 270 mingdan ortiq turli millatga mansub xorijliklar mamlakatdan chiqarib yuborilgan.