14-may kuni O‘zbekistonda sodir bo‘lgan muhim voqealar dayjesti

DXX: “Haj” va “Umra” ziyoratlarini qonunga xilof ravishda tashkil etishga uringan sayyohlik firmalar vakillarining harakatlariga chek qo‘yildi

Hozirda mazkur holatlar yuzasidan barcha qonunbuzarlarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

Afg‘oniston Samarqanddagi Imom Buxoriy majmuasi qurilishi uchun marmar hadya qildi

Afg‘oniston tomonidan Samarqand shahrida barpo etilayotgan Imom Buxoriy majmuasi qurilishi uchun yuborilgan 16 ta yuk mashinasidagi Hirot oq marmari O‘zbekiston tomonidan qabul qilib olindi.

Mo‘g‘ulistonning "Hunnu Air" aviakompaniyasi sentabr oyidan boshlab O‘zbekistonga parvozlarni yo‘lga qo‘ymoqda

Tomonlar Toshkent va Ulan-Bator o‘rtasida to‘g‘ridan-to‘g‘ri muntazam yo‘lovchi qatnovlarini tashkil etish bilan bog‘liq masalalarni muhokama qildi.

Samarqandda “Tersak” turizm qishlog‘i ochildi

Tersak qishlog‘i zamonaviy infratuzilma va mahalliy madaniyat uyg‘unligini mujassam etgan holda, mahalliy va xorijiy sayyohlar uchun qiziqarli manzilga aylanishi kutilmoqda.

Xorazmdagi uylardan biriga asteroid tushgani rad qilindi

Bog‘ot tumanidagi uylardan birining dahlizi qulab tushgan. IIB hamda FVBning maxsus laboratoriya xizmatlari tomonidan o‘rganish ishlari olib borilganida hodisa joyida hech qanday fazo jismlari aniqlanmagan.

Bolalar ombudsmani: Yo‘llarda bolalar xavfsizligini ta’minlash choralari yetarli emas

Yo‘llarda bolalar xavfsizligini ta’minlash bo‘yicha chora-tadbirlar kengaytirilganiga qaramay, ular hali ham yetarli emas. Bu masalani har tomonlama ko‘rib chiqish kerak, dedi Oliy Majlisning Bolalar huquqlari bo‘yicha vakili Surayyo Rahmonova IIV Yo‘l harakati xavfsizligi xizmati rahbari Sherzod Ibragimov bilan uchrashuvda.

Toshkent viloyatida 13 ta noyob yodgorlikka 342 mlrd so‘m zarar yetkazilgani aniqlandi

Bosh prokuratura tomonidan Toshkent viloyatida madaniy meros obyektlarini muhofaza qilishga qaratilgan nazorat tadbirlari o‘tkazildi. Tekshirishda bir qator noyob arxeologiya yodgorliklariga jiddiy ziyon yetkazilgani aniqlandi.

Toshkent shahri Sergeli tumanida sodir bo‘lgan yong‘in o‘chirildi

Yong‘inni keltirib chiqargan sabablar hamda yetkazilgan zarar miqdori aniqlanmoqda.

Kamoliddin Behzod nomidagi Milliy rassomlik va dizayn institutiga yangi rektor tayinlandi

Mazkur lavozimga Madaniyat vazirligining “Taʼlim sohasini muvofiqlashtirish” bo‘limi boshlig‘i tayinlandi.

Rossiyada yolg‘iz qolgan bola O‘zbekistonga qaytarildi

Rossiyada ota-onasidan ajralgan voyaga yetmagan bola Toshkentga olib kelindi va ijtimoiy yordam markaziga joylashtirildi.

Misrda bo‘lish qoidalarini buzgani sababli 5 nafar o‘zbekistonlik ushlandi

Ulardan biri Misrda qonuniy asosda bo‘lib turganini tasdiqlovchi hujjatlarni taqdim etganidan so‘ng qo‘yib yuborilgan.

Yevropa Ittifoqi ham O‘zbekiston kompaniyalarini “qora ro‘yxat”ga kiritmoqchi

Yevropa Ittifoqi 17-yangi sanksiyalar paketi bo‘yicha kelishib oldi. Ular orasida BAA, Turkiya, Serbiya, Vetnam va O‘zbekiston kompaniyalari ham bor.

O‘zbekiston va Mo‘g‘uliston o‘rtasida turizm sohasida hamkorlikni rivojlantirish bo‘yicha muzokaralar o‘tkazildi

Muzokaralar davomida O‘zbekistonda turizm sohasini rivojlantirish, xorijiy va mahalliy sayyohlar oqimini oshirish, ushbu sohada faoliyat yuritayotgan xususiy tadbirkorlarga qulay sharoitlar yaratish bo‘yicha olib borilayotgan ishlar to‘g‘risida batafsil ma’lumot berildi.

O'zbekiston-Afg'oniston biznes-forumida 45 mln AQSh dollariga teng bo'lgan 16 ta bitim imzolandi

Savdo-sanoat palatasi raisi Davron Vaxobov boshchiligidagi mamlakatimiz ishbilarmon doiralari vakillaridan iborat delegatsiyaning Kobulga safari doirasida O'zbekiston-Afg'oniston biznes-forumi va "V2V" shaklidagi uchrashuvlar tashkil etildi.

O‘zbekiston noyabr oyida “Markaziy Osiyo — Yevropa Ittifoqi” iqtisodiy forumiga mezbonlik qiladi

Yevropa Ittifoqi elchisi Toyvo Klaarning so‘zlariga ko‘ra, YeI, shuningdek, Shavkat Mirziyoyevning Kengaytirilgan sheriklik va hamkorlik to‘g‘risidagi bitimni imzolash uchun Bryusselga tashrifini kutmoqda.