Қишлоқ хўжалигига мўлжалланган ерларни ижарага олиш ҳуқуқи аукцион орқали реализация қилинади

Қарор лойиҳасида деҳқон хўжалиги юритиш учун ер участкаларини ижарага олиш ҳуқуқини электрон онлайн-аукцион орқали реализация қилиш тартибини назарда тутувчи Деҳқон хўжалигини юритиш учун ер участкаларини ижарага бериш ҳамда қишлоқ хўжалиги мақсадлари учун ер участкаларини ижарага олиш ҳуқуқини электрон онлайн-аукцион орқали реализация қилиш тартибини назарда тутувчи Юридик шахсларга қишлоқ хўжалиги мақсадлари учун ер участкаларини ижарага беришнинг маъмурий регламентлари тасдиқланиши назарда тутилмоқда.

Унга кўра, қишлоқ хўжалигига мўлжалланган бўш турган ер участкаларига доир маълумотларни шакллантириш ва келишиш E-ijara ахборот тизими орқали амалга оширилади.

Қишлоқ хўжалигига мўлжалланган ер майдонларидан самарали фойдаланиш, ихтисослигини белгилаган ҳолда бўш турган ер майдонларини қишлоқ хўжалиги корхонаси ёки деҳқон хўжалиги ташкил этиш учун электрон онлайн-аукцион орқали реализация қилиш бўйича лойиҳалар тайёрлаш ҳамда кўриб чиқиш ва тасдиқлаш учун E-ijara орқали манфаатдор вазирлик ва идоралар билан келишилади.

Ер тузиш лойиҳалари манфаатдор вазирлик ва идоралар томонидан маъқуллангандан сўнг, қишлоқ хўжалигига мўлжалланган ер майдонларини электрон онлайн-аукцион орқали реализация қилиш учун E-auksion электрон савдо платформасига юборилади.

Такроран ўтказилган электрон онлайн-аукционда ҳам талабгор чиқмаган ҳамда ғолиб аниқланмаган ер участкалари ер тузиш лойиҳаларини янгидан шакллантириш, заруратга кўра, ер участкаси майдони, ихтисослашувини ўзгартирган ҳолда талаб юқори бўлган бошқа йўналишлар бўйича электрон онлайн-аукцион орқали реализация қилиш учун аукционга чиқарилади.

Қишлоқ хўжалигига мўлжалланган ер участкаларини электрон онлайн-аукцион орқали ижарага беришда ер участкалари белгиланган тартибда аниқланган норматив қийматига мос тарзда ҳар йили тўлаб бориладиган бошланғич нархи шакллантирилган ҳолда аукцион савдоларига чиқарилади.

Йиллик ижара тўловлари йиллик инфляция даражасидан келиб чиқиб белгиланади, яъни тўлов амалга оширилган санадаги норматив қиймат ўтган йилдаги ер норматив қийматига нисбатан ўзгариш коэффициентини кўпайтириш орқали ҳисобланади.

Йиллик ижара тўловлари ҳар бир календар йили учун ҳисобланган миқдори ҳисобот йилида 15 апрел ва 15 октябрга қадар тенг улушларда тўланади.

Ер участкасидан икки йил мобайнида фойдаланилмаганида ер участкасига бўлган ҳуқуқ бекор қилинмасдан, белгиланган солиқ ставкаси икки баравар оширилган ҳолда ҳамда аукцион ғолиби ер участкасига ижара ҳуқуқини қўлга киритганидан сўнг уч йил ичида сув тежовчи технологиялар жорий қилинмаганда белгиланган сув солиғи ставкаси икки баравар оширилган ҳолда қўлланади.

Қишлоқ хўжалигига мўлжалланган ер участкаларини электрон онлайн-аукцион орқали ижарага олиш ҳуқуқини қўлга киритиш учун аукцион ғолиби томонидан таклиф этилган тўловнинг 10 фоизи ер участкасини ижарага олиш шартномаси имзоланишидан олдин, қолган маблағлар ер участкаси ижарага берилган вақтдан амалга оширилади, тўловларнинг 50 фоизи давлат бюджетига ва 50 фоизи Қишлоқ хўжалиги вазирлиги ҳузуридаги Қишлоқ хўжалигини ривожлантириш ва озиқ-овқат таъминоти жамғармасига йўналтирилади ҳамда уларнинг алоҳида ҳисоби юритилади.

Ер участкаларини электрон онлайн-аукцион орқали ижарага олиш ҳуқуқини реализация қилиш орқали тушадиган маблағлар қатъий равишда инвестиция ва ижтимоий инфратузилмани ривожлантириш дастурларига мувофиқ тегишли ҳудудда қишлоқ ва сув хўжалиги инфратузилмасини ривожлантириш, шу жумладан суғориш тизимларини яхшилаш, замонавий суғориш ва сув тежовчи технологияларни жорий этиш учун зарур инфратузилмани яратиш, ер тузиш ишларини институционал ривожлантириш, қишлоқ хўжалиги соҳасидаги сўнгги илмий янгилик ва инновацион ёндашувларни жорий этиш, кадрлар малакасини ошириш ҳамда ер ва сув ресурсларидан оқилона фойдаланиш тадбирларини молиялаштириш учун йўналтирилади.