«Birinchi navbatda infratuzilma». Prezident kommunikatsiyalarni tayyorlamasdan, loyihalarni boshlamaslikni buyurdi

Prezident Shavkat Mirziyoyev Toshkent shahrida 2045 yilgacha amalga oshirilishi rejalashtirilgan investitsiyaviy loyihalar bilan tanishdi. Bu haqda poytaxt hokimi Shavkat Umurzoqov maʼlum qildi.

Uning so‘zlariga ko‘ra, yaqin 20 yil davomida umumiy qiymati 58,5 mlrd dollar bo‘lgan 394 ta loyiha rejalashtirilmoqda.

«2025, 2026, 2027, 2028 va 2029 yillarga mo‘ljallangan besh yillik batafsil dastur taqdim etildi. Unda qaysi loyihalar va qayerda amalga oshirilishi ko‘rsatilgan», — dedi u.

Hokim har bir investitsiya loyihasini ishlab chiqish bo‘yicha prezident tomonidan moliyalashtirish manbalari, investorlar, hajmlar, muddatlar, yaratilgan ish o‘rinlari, sanoat mahsulotlari va xizmatlar ko‘rsatish hajmi ko‘rsatilgan holda aniq talablar qo‘yilganini taʼkidladi.

«Bu rejalashtirish va kelajakni ko‘ra bilishga juda ham yengillik beradi. Biz oldin bunday ishlar amalga oshirmaganmiz. Endi loyiha boshlanishidan oldin qancha ish o‘rni paydo bo‘lishi va qaysi tarmoqlarda qancha podstansiya qurish, qancha elektr, gaz, suv tarmoqlarini tortish, qancha kanalizatsiya quvvatini oshirish, har yili har bir loyiha asosida yilma-yil hisob-kitobi qilingan», — dedi u.

Hokimning so‘zlariga ko‘ra, prezident seysmik xavfsizlik va kommunal infratuzilma masalalariga ustuvor eʼtibor qaratish bo‘yicha topshiriq bergan.

«Prezidentimiz kommunal infratuzilma yaratilgandan keyingina loyihalashtirish va amalga oshirish bo‘yicha qatʼiy topshiriq berdi. Bu quruvchilarimiz, hokimliklar va boshqa idoralar vakillarining masʼuliyatini oshiradi», — dedi u.

Hokim keng ko‘lamli dasturni amalga oshirish uchun xalqaro tajribadan foydalanilayotgani, xorijdan mutaxassislar jalb etilayotganini qo‘shimcha qildi.