Неймар коронавирусга чалинди
Бразилияда жойлашган Сан-Паулу шаҳрининг “Сантос” клуби вингери Неймарда COVID-19 инфекцияси аниқланди. Бу ҳақда “O Globo” хабар берди.
Маълум қилинишича, футболчининг касаллиги клубда қолиши мавҳум бўлиб турган бир пайтда аниқланган ва у инфекция туфайли жамоанинг машғулотларида иштирок эта олмаяпти.
Неймарнинг COVID-19’га топширган тести ижобий чиққан. “Сантос” клуби ҳам 7 июнь куни футболчининг соғлиғи ҳақидаги ҳолатни эълон қилган.
“5 июнь куни бошланган вирусли инфекция сабабли футболчи Неймар “Сантос” футбол клубининг тиббий бўлими кўригидан ўтказилди ва лаборатория таҳлиллари COVID-19 инфекциясини тасдиқлади. Футболчи аломатлар пайдо бўлган пайтдан бошлаб фаолиятдан четлатилган, ҳозирда у уйида дам олмоқда ва шифокор кўрсатмасига биноан симптоматик даволанмоқда”, дейилади клуб баёнотида.
Қайд этилишича, 5 июнь кунидан бери Неймар машғулотларда қатнашмаяпти. Эндиликда у тиббий бўлим рухсатини кутмоқда, шунда фаолиятини чекловсиз давом эттириши мумкин бўлади.
Бу соғлиқ муаммоси Неймар учун ноаниқликлар даврида юз берган. Унинг “Сантос” клуби билан амалдаги шартномаси 30 июнь кунига қадар амал қилади, аммо ҳозирча шартномани узайтириш бўйича томонлар ўзаро келишувга эришмаган.
.png "YouTube UZREPORT TV")
